បារីស៖ ប្រធានាធិបតីបារាំង លោក អេម៉ាញ៉ូអែល ម៉ាក្រុង បានលើកឡើងថា បារាំងចូលរួមជាមួយកម្ពុជាក្នុងការអំពាវនាវដល់ប្រទេសរុស្ស៊ីក្នុងការបញ្ឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធក្នុងប្រទេសអ៊ុយក្រែនបន្តទៀត។

លោកប្រធានាធិបតីបានបង្ហោះនៅលើបណ្ដាញទំនាក់ទំនងសង្គម Twitter របស់លោកបន្ទាប់ពីមានជំនួបជាមួយនាយករដ្ឋមន្ត្រីកម្ពុជា សម្ដេចតេជោ ហ៊ុន សែន កាលពីម្សិលមិញ។

លោក ម៉ាក្រុង បានសរសេរថា៖ «សង្គ្រាមរុស្ស៊ីអ៊ុយក្រែនបានបង្កឱ្យមានទុកវេទនាខ្លាំងជាខ្លាំង។ ចូលរួមជាមួយកម្ពុជា ពួកយើងអំពាវនាវដល់រុស្ស៊ីឱ្យឈប់ការវាយប្រហារលើជនស៊ីវិល និងហេដ្ឋារចនាសម្ព័ន្ធក្នុងប្រទេសនេះភ្លាម។ សូមដៃគូរអន្តរជាតិចូលរួមជាមួយយើងក្នុងការអំពាវនាវនេះ»។

រុស្ស៊ីបានបើកការវាយប្រហារលើប្រទេសអ៊ុយក្រែនកាលពីចុងខែកុម្ភៈ បន្ទាប់ពីប្រទេសអ៊ុយក្រែនចង់ចូលជាសមាជិកនៃអង្គការណាតូ ដែលរុស្ស៊ីចាត់ទុកថាជាការគំរាមកំហែងដល់សន្ដិសុខរបស់ខ្លួន។ ទោះជាយ៉ាងណាសម្រាប់កម្ពុជាបានប្រឆាំងនឹងការឈ្លានពាននេះនិងបានបោះឆ្នោតនៅអង្គការសហប្រជាជាតិឱ្យរុស្ស៊ីដកទ័ពចេញទៅវិញផងដែរ៕ 

^{PHOTO: Ngin Sophea}